Паважаныя жыхары Брагіншчыны!
Сардэчна віншуем вас з 75-й гадавінай Перамогі ў Вялікай Айчыннай вайне!
Кожны год у святы для нас дзень 9 Мая мы аддаём даніну вялікай павагі бяспрыкладнаму подзвігу савецкага народа. Нізка схіляем галовы перад памяццю тых, хто загінуў на полі бою, хто быў закатаваны ці расстраляны фашыстамі, памёр ад ран у мірны час, хто пайшоў з жыцця ўжо ў нашы дні, унёсшы вялікі ўклад у аднаўленне народнай гаспадаркі і патрыятычнае выхаванне падрастаючага пакалення.
Мы з глыбокай удзячнасцю гаворым самыя цёплыя словы ветэранам, якія сёння знаходзяцца побач з намі. Франтавікі, партызаны, працаўнікі тылу, удовы і сіроты тых, хто не вярнуўся з вайны дамоў – усе вы вынеслі неймаверныя пакуты найцяжэйшых выпрабаванняў. Але выстаялі і перамаглі, каб жыць, працаваць, будаваць светлае заўтра сваёй Радзімы. Дзякуй за тое, што падарылі свабоду і мір!
Жадаем усім здароўя і шчасця! Каб над галавой было толькі чыстае, бязвоблачнае неба! Мы цэнім і шануем спадчыну – свабоду і незалежнасць – і будзем усё рабіць, каб родная Беларусь квітнела, каб народ яе жыў дастойна і радасна.
Са святам!
Аляксандр КОХАН,
старшыня раённага выканаўчага камітэта
Аляксандр КАЛЯСАН,
старшыня раённага Савета дэпутатаў
