Захаванне культурнай спадчыны – асноўны накірунак працы раённага метадычнага цэнтра народнай творчасці і культурна-асветніцкай працы, які аб’ядноўвае клубныя ўстановы Брагіншчыны. Супрацоўнікі цэнтра праводзяць работу па адраджэнні традыцый нашага краю, таго, што было згублена з цягам часу ці з-за аварыі на Чарнобыльскай АЭС.
Вялікая ўвага тут надаецца павышэнню прафесійнага майстэрства і паляпшэнню якасці ведаў супрацоўнікаў клубаў. Так, два разы ў месяц працуе школа кіраўніка, дзе дырэктары культурных устаноў атрымліваюць розныя навыкі. Напрыклад, у мінулую пятніцу прайшлі заняткі па саломапляценні. Праводзіла іх выпускніца Гомельскага каледжа народна-мастацкага промыслу, а сёння – метадыст па дэкаратыўна-прыкладным мастацтве цэнтра Аліна Пугач.
Дарэчы, вырабы з саломкі незвычайна прывабныя і цудоўна ўпісваюцца ў інтэр’ер сучасных памяшканняў. Такія сувеніры будуць прыемным падарункам да любога свята. Далучыцца да старадаўняга беларускага рамяства і паспрабаваць стварыць маленькія шэдэўры сваімі рукамі ў хуткім часе змогуць усе жадаючыя, наведаўшы ўстановы культуры.
Як паведаміў дырэктар метадычнага цэнтра народнай творчасці і культурна-асветніцкай працы Сяргей Даўгулявец, акрамя гурткоў, у раёне дзейнічаюць аматарскія аб’яднанні і клубы па інтарэсах. Жыхары вёсак збіраюцца разам, каб падзяліцца вопытам і творчымі ідэямі: як правільна збіраць лекавыя травы ці гатаваць нацыянальныя стравы, раскрываюць сакрэты рукадзелля і інш. З дапамогай вясковых умельцаў плануецца таксама адрадзіць многія амаль забытыя народныя рамёствы, сярод якіх – лазапляценне і ганчарная справа.
Прыемна, што да заняткаў продкаў праяўляе цікавасць моладзь. У гуртках юным майстрам не проста прывіваюцца навыкі творчай працы з прымяненнем разнастайных матэрыялаў. Дзеці асэнсавана падыходзяць да справы, разумеючы, што мала ганарыцца мастацтвам свайго народа ў мінулым, трэба быць яшчэ і годнымі пераемнікамі яго лепшых традыцый.
