Напярэдадні Дня памяці воінаў-інтэрнацыяналістаў, які ў Беларусі адзначаецца 15 лютага, на Брагіншчыне ўшанавалі памяць загінуўшых воінаў-афганцаў.
Ветэраны-афганцы Валерый Чарнянок і Віктар Балобан, старшыня раённай арганізацыі Беларускага грамадскага аб’яднання ветэранаў Любоў Дзяркач і галоўны спецыяліст галоўнага ўпраўлення па праблемах ліквідацыі наступстваў катастрофы на Чарнобыльскай АЭС Аляксандр Калясан наведалі месцы вечнага спачыну герояў, аддаўшы даніну павагі іх мужнасці і самаадданасці.
Першы прыпынак – вёска Залессе, выселеная пасля аварыі на Чарнобыльскай АЭС. Тут пахаваны Віктар Сцепаненка. Нарадзіўся ён у 1960 годзе. 4 кастрычніка 1978 года быў прызваны ў армію. Трапіў у Афганістан. У сваім апошнім лісце да родных, поўным трывогі і надзеі, ён пісаў: «…верце, вельмі верце, што я вярнуся…». Але 25 снежня 1979 года самалёт, на якім ляцеў радавы Сцепаненка, баец 103-й паветрана-дэсантнай дывізіі, пацярпеў крушэнне ў раёне Кабула.
Наступны прыпынак – Хатуча, таксама выселеная вёска. Тут знаходзіцца магіла Віктара Балобана, які нарадзіўся ў 1965 годзе. З дзяцінства Віктар захапляўся тэхнікай, а пасля вучылішча працаваў трактарыстам. У 1984 годзе лёс закінуў яго ў Афганістан. 11 лістапада 1984 года яго баявая машына пяхоты падарвалася на фугасе падчас разведвальнай аперацыі.
Апошнім пунктам стаў Брагін, дзе пахаваны Віталій Кіпцік. Нарадзіўся ён у 1963 годзе. Пасля заканчэння ваеннага вучылішча, у званні лейтэнанта, быў накіраваны ў Афганістан. 8 снежня 1984 года яго ўзвод трапіў у засаду, і Віталій, камандуючы падраздзяленнем, загінуў.
Усе трое пасмяротна ўзнагароджаны ордэнам Чырвонай Зоркі.
