Праект не толькі прыцягнуў увагу жыхароў райцэнтра, але і стаў прарывам для развіцця музычна-тэатральнай культуры краіны.
Ініцыятыва, якая рэалізуецца ў рамках гранта Прэзідэнта Рэспублікі Беларусь, ставіць амбіцыйную мэту – паказаць, што свет оперы можа быць сучасным, стыльным і захапляльным. Артысты галоўнага музычнага тэатра краіны прадставілі публіцы не проста фрагменты класічных пастановак, а цэлую палітру культурных праектаў, прадэманстравалі шматграннасць і эвалюцыю опернага мастацтва.
– Для беларускай культурнай прасторы гэта ўнікальны праект, – падзялілася рэжысёр Ганна Маторная. – Ён адкрывае новыя гарызонты для развіцця музычнай тэатральнай культуры Беларусі. Наша галоўная задача – аб’яднаць акадэмічны жанр, высокае майстэрства выканання з такімі папулярнымі напрамкамі, як рок-опера, мюзікл і, вядома ж, класічны красовер, які сцірае любыя жанравыя межы. Праект выводзіць беларускае опернае мастацтва і выканальніцкую культуру на новы, больш высокі ўзровень, дазваляе беларускай музыцы загучаць ва ўнісон з сучаснымі тэндэнцыямі.
Артысты паказалі, што класіка можа здабыць новае гучанне, прыцягнуць больш шырокую аўдыторыю. Спалучэнне вядомых оперных матываў з элементамі рока і мюзікла здольна абудзіць цікавасць да гэтага, здавалася б, строгага жанру, сярод моладзі і тых, хто раней не лічыў оперу «сваім» мастацтвам.
