У Лоеве прайшоў рэспубліканскі фестываль спартыўных навыкаў пад эгідай Беларускай федэрацыя футбола ў рамках праекта «Мой школьны футбольны клуб». У майстэрстве футбольных навыкаў спаборнічалі вучні 3–5 класаў з дзевяці рэгіёнаў вобласці. Сярод удзельнікаў – вучні Брагінскай сярэдняй школы: Юрый Лепеха, Давід Сініла і Вікторыя Заяц.
Фестываль праходзіў у фармаце асабістага першынства, дзе кожны ўдзельнік імкнуўся паказаць свой максімум у пяці этапах. Галоўная задача – набраць як мага больш ачкоў.
У рамках праграмы ўдзельнікам трэба было прайсці «змейку» вакол конусаў, прадэманстраваць філіграннае валоданне мячом і ўменне манеўрыраваць на высокай хуткасці. Акрамя гэтага, за абмежаваны час, усяго 30 секунд, юныя футбалісты павінны былі выканаць дакладныя ўдары па гімнастычнай лаўцы, выкладзенай на бок. Задача – дамагчыся, каб мяч, адскочыўшы ад лаўкі, перасёк пазначаную лінію, што патрабавала не толькі сілы, але і ідэальнага разліку.
– Таксама трэба было за тры ўдары навесіць мяч дакладна ў акрэслены квадрат. Асаблівая ўвага надавалася тэхніцы удараў па розных частках спецыяльнага навучальнага макета – «канверта», – расказаў настаўнік фізічнай культуры і здароўя Брагінскай сярэдняй школы Міхаіл Канавальчык.
Удзельнікі прадэманстравалі высокі ўзровень падрыхтоўкі і глыбокае разуменне гульні. Вызначыўся і Юрый Ляпеха – ён заняў другое месца.
Памятныя падарункі ад Беларускай федэрацыі футбола, яркія эмоцыі і хвалюючыя моманты гульні – усё гэта стала стымулам для юных футбалістаў.
– Фестываль запаліў новыя іскры ў сэрцах будучых зорак беларускага футбола, падарыў ім зарад матывацыі для далейшых трэніровак і імкнення да новых перамог, – адзначыў Міхаіл Канавальчык.
