Сёлета яны змагаюцца за выхад у наступны этап з Ельскам, Хойнікамі і Нароўляй.
У першым матчы на мясцовым стадыёне зямлякі прымалі «Стралу» з Нароўлі. Са стартавага свістка гаспадары поля заявілі пра свае намеры – узяць гульню пад свой кантроль. Агрэсіўны стыль, інтэнсіўны прэсінг – здавалася, што абарона нараўлянцаў вось-вось будзе прарвана. Аднак брагінчане дапусцілі памылку, якая каштавала ім дорага. Госці скарысталіся замешкай гаспадароў і адкрылі лік. Нібы адчуўшы слабасць праціўніка, яны змаглі падвоіць сваю перавагу. Здавалася, што першы тайм скончыцца з адставаннем брагінчан у два галы. Але, нягледзячы на цяжкасці, мясцовая каманда сабралася і, праявіўшы волю да барацьбы, забіла адзін мяч перад перапынкам, пакінуўшы інтрыгу.
– Кіраўніцтва каманды цвяроза ацэньвала фізічны стан кожнага гульца. Футбалісты прытрымліваліся ўстаноўкі трэнера, і неабходнасці ў правядзенні замен у першай палове не было, – пракаменціраваў брагінчанін Ягор Арцёменка.
Відавочна, што трэнерскі штаб брагінчан не жадаў мірыцца з паражэннем. Падчас перапынку былі праведзены тактычныя перастаноўкі. Гэтыя крокі прынеслі свой плён. Другі тайм вызначыўся больш упэўненай гульнёй у абароне. Сцяна, пабудаваная брагінчанамі, не дазволіла «Страле» забіць дадатковыя мячы. Нягледзячы на палепшаную гульню і шматлікія старанні, камандзе так і не ўдалося зраўняць лік. Фінальны свісток зафіксаваў мінімальнае паражэнне гаспадароў поля з лікам 1:2.
– Футбол – непрадказальны від спорту, – падвёў вынік Ягор Арцёменка. – Матч паказаў нядрэнную гульню нашай каманды на старце сезона. Мы стваралі небяспечныя моманты на працягу ўсёй гульні, але не хапіла рэалізацыі. Стартавае супрацьстаянне заўсёды паказвае памылкі, якія ў далейшым нельга дапускаць.
Уражаннямі ад матча падзяліўся варатар землякоў Пётр Сачанка:
– На першую гульню чэмпіянату мы настройваліся адказна. Першы тайм пачаўся на роўных, у некаторых момантах мы нават былі больш актыўныя, але ў сярэдзіне адведзенага часу сапернік правёў добрую пазіцыйную атаку і забіў гол. Мы не апусцілі рукі і працягвалі спрабаваць навязваць гасцям свой стыль гульні, ды зноў памыліліся, і сапернік забіў другі мяч. У канцы тайма блытаніна паміж варатаром і абаронцам «Стралы» прывяла да аўтагола. Лік стаў 2:1. Пасля перапынку гульня была роўнай, але мяч не ішоў у вароты нараўлянцаў. Госці ў сярэдзіне тайма зрабілі шэраг замен, што павысіла іх актыўнасць, але надзейная гульня брагінчан не дазволіла саперніку павялічыць лік. У выніку – 2:1 не на нашу карысць. Варта адзначыць, што мы дадалі ва ўсіх кампанентах гульні, а галоўнае – фізічны складнік. Мы навучыліся трымацца да канца і змагацца за кожны мяч.
У другім матчы брагінчане прынялі каманду з Хойнік. У гэтай сустрэчы нашы землякі выходзілі на поле фаварытамі. З пачатку гульні яны пачалі актыўна атакаваць, наносіць далёкія ўдары, на што сапернік, здавалася, не мог знайсці адказу. Старанні землякоў былі ўзнагароджаны голам на 12-й хвіліне матча. Не збіраючыся спыняцца, яны працягвалі гуляць у футбол, якога так доўга чакалі балельшчыкі. Да 30-й хвіліны брагінчане забілі другі гол. Ужо ў першым тайме хайнікчане пачалі рабіць замены, і адна з іх прынесла плён: абаронца памыліўся, і госці скарысталіся гэтым, адыграўшы адзін мяч. Такім чынам, першы тайм завяршыўся з перавагай землякоў 2:1.
Другі пачаўся ў тым жа ключы: брагінчане актыўна атакавалі. Аднак удача ад іх адвярнулася. Да сярэдзіны другога тайма суседзі рэалізавалі 11-метровы ў вароты брагінчан. А ў канцы сустрэчы забілі яшчэ адзін гол з пенальці, тым самым пазбавіўшы брагінчан перамогі.
– Крыўднае паражэнне надасць нам яшчэ больш сілы, – пракаменціраваў Пётр Сачанка.
Нягледзячы на няўдачы, турнірнае становішча землякоў пакуль выглядае не безнадзейна.
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook, Viber.