У сучасным свеце, дзе межы сціраюцца, а кар’ерныя магчымасці адкрытыя, ёсць нешта асаблівае ў тых, хто, атрымаўшы адукацыю, вяртаецца на малую радзіму. Гэта не проста прафесійнае рашэнне, а асэнсаваны выбар, прадыктаваны любоўю да родных мясцін, жаданнем унесці ўклад у развіццё свайго краю і імкненнем быць бліжэй да сваіх каранёў. Такая моладзь, поўная энергіі, свежых ідэй і энтузіязму, становіцца рухавіком прагрэсу для сваіх малых гарадоў і вёсак.
Як прыклад – Ганна Корхава, настаўніца працоўнага навучання і выяўленчага мастацтва. Пасля вучобы ва ўніверсітэце яна вярнулася ў Брагінскую сярэднюю школу, дзе некалькі гадоў назад сама сядзела за партай. Сёння яна не толькі вучыць дзяцей, але і натхняе іх, дзеліцца ведамі, творчым запалам.
Нарадзілася Ганна ў Брагіне, і яе жыццё непарыўна звязана з гэтым месцам. Пасля школы яна паступіла ў Мазырскі дзяржаўны педагагічны ўніверсітэт імя І.П. Шамякіна. Атрымаўшы спецыяльнасць «Абслугоўваючая праца і выяўленчае мастацтва», прадоўжыла навучанне ў магістратуры, дзе стварыла калекцыю адзення і тым самым прадэманстравала не толькі тэхнічныя навыкі, але і творчы патэнцыял.
Цяпер Ганна працуе разам з тымі настаўнікамі, якія далі ёй веды. Вопыт старэйшых тут спалучаецца з энергіяй і наватарскімі ідэямі моладзі.
Аб педагагічнай дзейнасці Ганна марыла з дзяцінства. Прыкладам быў дзядзька Уладзімір Міхайлавіч Корхаў, дырэктар ДЮСШ Брагінскага раёна. А любоў да творчасці і мастацтва глыбока ўкараніліся ў сямейных традыцыях. Маці Алена Васільеўна навучыла Ганну вязаць на спіцах. Бацька таксама валодае гэтым відам рукадзелля – навык Віктар Міхайлавіч пераняў ад сваёй маці Надзеі Іванаўны. А цяпер вязаннем захапляецца і яго дачка. Яна стварае ўласнымі рукамі цёплыя падарункі для родных і блізкіх.
Маладая настаўніца лёгка знаходзіць агульную мову з дзецьмі, заўважае іх інтарэсы і схільнасці. На ўроках выкарыстоўвае нестандартныя падыходы, што робіць іх займальнымі і запамінальнымі. Пад яе кіраўніцтвам вучні актыўна ўдзельнічаюць у раённых і абласных праектах, развіваюць свой творчы патэнцыял, пашыраюць кругагляд і набываюць каштоўны жыццёвы вопыт.
Ганна сёння выхоўвае новае пакаленне брагінчан, закладвае ў іх уменне бачыць прыгожае, любоў да творчасці і глыбокую павагу да родных каранёў.
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook, Viber.
